قناة المقاومة الايرانيه
السلام عليكم انا غالية رحال ام الشهيد خالد العيسى، خالد العيسى الذي طلع منذ بداية المظاهرات السلمية في سوريا في مدينة كفر نبل ، كان من الثائرين الأوائل و كان مستمر لاخر لحظة في الثورة لان كان ايمانه قوي كتير في القضية اللي عم بيدافع عنها عن بلدو و عن الناس اللي كانت عم بتموت بسبب الطيران السوري و الطيران الروسي و بسبب ظلم النظام عندنا في سوريا ،
خالد كان مؤمن جدا في القضية السورية و كان يقول لي: يا امي انا معتبر نفسي ميت من اول يوم طلعت فيه مظاهرة و راح اشتغل للناس االموجودة بس لان كل الناس اللي استشهدت ما هي احسن منا ، و اكيد بعد كل التضحيات الي راح نضحيها راح نلاقي نتيجتها ، اذا ما لقيناها نحنا رايحين الأطفال الموجودين راح يلاقو نتيجتها في الأيام اللي جاية ان شاء الله ، خالد كان يروح على حلب كتير و كان يوثق الجرائم الموجودة هونيك و اخر مكالمة قال لي: يا امي في كتير ناس عم تنقصف و تنضرب في حلب بس ما كان فيه نسبة اعلاميين كبيرة في حلب لذلك انا بدي روح لهونيك مشان اوثق الجرائم اللي موجودة هونيك ، كانت كامرته و الصور اللي كان يصورها بتحكي كتير على انتهاكات حقوق الانسان اللي كانت تصير في حلب ،
اخر جملة قالي إياها بدنا الاف المصورين و الإعلاميين لحتى يغطوا الجرائم اللي عم بتصير في حلب ، ما راح انسى ابدا انو خالد كان من مؤسسي لمنظمة ال يو ار بي و كان من مؤسسي مؤسسة مزايا و اللي انا بشتغل فيها ، خالد كان عطول يقولي امي اذا كنت موجود او مو موجود بدك تابعي العمل في مؤسسة مزايا ، طبعا كان يعلمني كتير شغلات رغم انو هو ابني صحيح و انا امو ، بس كنت كتير اقتبس منه لاستمرارية المؤسسة و العمل في المجال النسائي في مدينة كفر نبل ،
كان يقلي امي اشتغلي على أساس انو النساء مستمرات في وقت الحرب و يتعايشن مع وضع الحرب حتى في الأيام الجاية ينشىء جيل ما فيه اجرام ما فيه قتل ما فيه دمار يكون كله سلام ، كان يقولي امي اذا كنت موجود او ماني موجود استمري في شغلك و لازم تكملي شغلك و اذا كنتي موجودة او مانك موجودة انا كمان راح استمر في شغلي ، مشان هيك انا راح استمر في الشغل لان روح خالد راح تكون معي متواصلة معي حتى لو غاب جسده روحو راح تظل معي ، بصفتي مواطنة سورية أولا و امو للشهيد خالد العيسى ثانيا و اللي طلعنا من بدايات الثورة السورية و راح نظل ان شاء الله و تعالى متابعين لحتى اخر نفس فينا ، أقول للمقاومة الإيرانية: الله يقويكون يا رب اول شغلة ، ثاني شغلة تكون قضيتكون كاملة و واحدة و ايمانكم فيها قوي ، انها تكون اول شغلة لطلب الحرية و الكرامة الحرية ،
و الكرامة ثمنها غالي كتير ، ثمنها ارواحنا و أرواح أطفالنا و أرواح أولادنا و شبابنا ، راح نكون اقوى حتى لو خسرنا أرواح اغلى الناس عندنا ، راح نتابع من اجل عيون الأطفال عندنا ، راح نتابع مشان جيل قادم يكون اقوى و يكون امهر ، راح نتابع ان شاء الله و تعالى من اجل الكرامة و الحرية اللي هي مثل ما قلتلكم ثمنها غالي كتير ما هو قليل ، نحنا نعرف ثمنها كتير رغم ها الشيء راح نتابع و نثابر مشانها ، لا للطغاة لا للكفر لا للدمار لا للقتل من اجل السلام فقط نحنا راح نعيش راح نتابع راح نضحي من اجل السلام و ولا شيء غير السلام